आमगाव: श्रद्धेय लक्ष्मणराव मानकर गुरुजी यांच्या जयंतीचे औचित्य साधून भवभूती शिक्षण संस्था द्वारा संचालित लक्ष्मणराव मानकर इन्स्टिट्यूट ऑफ फार्मसी, आमगाव येथे दि. 4 फेब्रुवारी 2026 रोजी भव्य निःशुल्क आरोग्य तपासणी व रक्तदान शिबिराचे आयोजन करण्यात आले. महाविद्यालयाच्या प्रशस्त प्रांगणात पार पडलेल्या या उपक्रमाचे आयोजन सहयोग मल्टीस्पेशालिटी हॉस्पिटल, गोंदिया व इंडियन डेंटल असोसिएशन शाखा गोंदिया यांच्या संयुक्त विद्यमाने करण्यात आले होते.
या शिबिरात हृदयरोग, मधुमेह, कान-नाक-घसा विकार, नेत्ररोग, दंतरोग तसेच मुख कर्करोग आदी आजारांची सखोल तपासणी करण्यात आली. तज्ञ वैद्यकीय सल्ल्यासह नागरिकांना योग्य मार्गदर्शन देण्यात आले. यासोबतच ब्लड शुगर, रक्तदाब, ईसीजी, रक्तगट व हिमोग्लोबिन यांसारख्या आवश्यक तपासण्या पूर्णतः विनामूल्य करण्यात आल्या.
सहयोग हॉस्पिटलतर्फे डॉ. आदित्य जगदाळे, डॉ. शाश्वत सोनटक्के, डॉ. ओम दोनोडे, प्रवीण बहेकार यांनी तर इंडियन डेंटल असोसिएशनतर्फे डॉ. मौसमी तिवारी, डॉ. शिवांगी निंबेकर, डॉ. श्रुती जयस्वाल, डॉ. नेहा बोरकर, डॉ. रजत तिवारी, डॉ. पलक तिवारी, डॉ. कटरे आदी तज्ञ डॉक्टरांनी शिबिरात आपली सेवा नि:स्वार्थपणे प्रदान केली.
हे संपूर्ण आयोजन महाविद्यालयाच्या राष्ट्रीय सेवा योजना विभागामार्फत राबविण्यात आले. बी. फार्म आणि डी. फार्म या अभ्यासक्रमातील विद्यार्थ्यांनी स्वयंसेवक म्हणून उत्स्फूर्त सहभाग नोंदवत शिबिराच्या यशात मोलाचा वाटा उचलला. शिबिरादरम्यान एकूण 125 नागरिकांनी आरोग्य तपासणीचा लाभ घेतला, तर 25 नागरिकांनी स्वेच्छेने रक्तदान करून सामाजिक बांधिलकीचे उदाहरण घालून दिले.
शिबिराच्या यशस्वी आयोजनासाठी डॉ. डी. के. संघी, डॉ. तुलसीदास निंबेकर, विजय राऊत, नंदलाल कतलेवार, कैलास पात्रीकर, रविशंकर राऊत, महेंद्र तिवारी, देवेंद्र बोरकर, चेतन बोरकर, रोशनी अग्रवाल, नरेंद्र कावळे, जितेंद्र शिवणकर तसेच महाविद्यालयातील सर्व प्राध्यापक व शिक्षकेतर कर्मचाऱ्यांनी परिश्रमपूर्वक सहकार्य केले.
या सामाजिक उपक्रमासाठी भवभूती शिक्षण संस्थेचे सचिव केशवराव मानकर, अध्यक्ष सुरेश बाबू असाटी, उपाध्यक्ष प्रमोद कटकवार तसेच संस्थेच्या सर्व सदस्यांचे मार्गदर्शन लाभले. आरोग्यसेवेच्या माध्यमातून सामाजिक जाणिवेचा संदेश देणारे हे शिबिर नागरिकांमध्ये विशेष प्रशंसेचा विषय ठरले.
Total Users : 882487
Total views : 6487764
