तुमसर : मोहाडी तालुक्यातील निलज खुर्द येथील ग्रामस्थांनी मग्रारोहयो अंतर्गत करण्यात आलेल्या पांदन रस्त्यांच्या कामात मोठ्या प्रमाणावर भ्रष्टाचार झाल्याचा आरोप करत बुधवारी पत्रकार परिषद घेतली. यावेळी ग्रामस्थांनी शासनाला दहा दिवसांची मुदत देत, कारवाई न झाल्यास पंचायत समिती मोहाडी समोर आत्मदहन करण्याचा इशारा दिला.
ग्रामस्थांच्या माहितीनुसार, सन २०२३-२४ ते २०२४-२५ या कालावधीत निलज खुर्द येथे तब्बल ८८ लाख रुपयांचा चार पांदन रस्त्यांचा खडीकरणाचा प्रकल्प करण्यात आला. यात,गुलाब पिंगळे ते रामचरण ढेंगे शेतरस्ता (२२ लाख)युवराज मोहतुरे ते सुभाष तितीरमारे शेतरस्ता (२२ लाख)नत्थू शेंडे ते बाबुराव भोयर रोता रस्ता (२२ लाख)सरोदी भोयर ते मंगल भोयर शेतरस्ता (२२ लाख)असा एकूण अंदाजे ८८ लाख रुपयांचा खर्च दाखविण्यात आला.
मात्र, या कामात माती-मुरूम टाकणे, रोलरने दाबाई करणे, गिट्टी टाकणे असे आवश्यक टप्पे पूर्ण न करता केवळ जेसीबी व ट्रॅक्टरच्या सहाय्याने वरवरचे काम करण्यात आल्याचा आरोप ग्रामस्थांनी केला. ग्रामस्थांच्या मते, गावातील भूमिहीन व मोलमजुरी करणाऱ्या कामगारांना कामावर न घेता बाहेरगावच्या लोकांची खोटी नावे हजेरी पत्रकात दाखवण्यात आली. त्यांच्या खात्यावर मजुरी जमा करून ती रक्कम परत घेण्यात आल्याचे गंभीर आरोप ग्रामस्थांनी रोजगार सेविका, सरपंच, ग्रामसेवक व पं.स. सदस्यांवर केले आहेत. “हे काम तांत्रिक अधिकाऱ्यांच्या संमतीनेच झाले असून हजेरी पत्रके त्यांच्याच सल्ल्यानुसार भरली गेली आहेत. त्यामुळे तांत्रिक व्यक्तींनाही दोषी धरून त्यांच्यावर गुन्हा दाखल व्हावा,” अशी मागणी ग्रामस्थांनी केली.ग्रामस्थांचे म्हणणे आहे की, लाखो रुपयांचा गबाळा करून शासनाची फसवणूक करण्यात आली आहे. या प्रकरणात तातडीने चौकशी करून दोषींवर कलम ४२० अंतर्गत गुन्हा दाखल करावा, शासनाची रक्कम वसूल करावी, अशी आमची मागणी आहे.
अन्यथा आम्ही ग्रामपंचायत कार्यालयाला ताळे ठोकून पंचायत समिती मोहाडी येथे आत्मदहन करू, असा थरारक इशारा तक्रार दार दूधराम बांते सह ग्रामस्थांनी पत्रकार परिषदेत दिला.
Total Users : 883068
Total views : 6488500
