
तुमसर : नगरपरिषद ही महाराष्ट्र नगर परिषद, नगर पंचायत व औद्योगिक नगर अधिनियम, 1965 (सुधारित) अंतर्गत कार्य करणारी लोकप्रतिनिधींची संस्था आहे. या अधिनियमाच्या तत्त्वांनुसार नगरपरिषदेचे कामकाज लोकशाही पद्धतीने व सर्व लोकप्रतिनिधींच्या सहभागातून चालविणे अपेक्षित आहे. प्रत्येक प्रभागातील नागरिकांच्या समस्या जाणून घेणे व त्यावर उपाययोजना करण्याची जबाबदारी संबंधित नगरसेवकांची असते. अशा परिस्थितीत नगराध्यक्षांकडून नागरिकांच्या तक्रारी ऐकण्यासाठी जनता दरबार आयोजित करणे ही बाब तत्त्वतः चांगली असली तरी, नगरसेवकांना कोणतीही पूर्वकल्पना न देता असा कार्यक्रम आयोजित करण्यात आल्यामुळे लोकप्रतिनिधींच्या अधिकार व अस्तित्वाला डावलण्याचा प्रयत्न होत असल्याची तीव्र भावना नगरसेवकांमध्ये निर्माण झाली आहे. या संदर्भात नगरपरिषद तुमसरचे मुख्याधिकारी यांना लेखी निवेदन देण्यात आले असून त्या निवेदनावर १४ नगरसेवकांच्या सह्या आहेत. नगरसेवकांना विश्वासात न घेता घेतलेल्या निर्णयाबाबत नगरसेवकांनी तीव्र नाराजी व्यक्त केली आहे.
नगरपरिषद ही एखाद्या व्यक्तीची खाजगी संस्था नसून ती संपूर्ण नगरातील नागरिकांनी निवडून दिलेल्या लोकप्रतिनिधींची सामूहिक संस्था आहे. त्यामुळे नगरपरिषदेचे कामकाज हे समन्वयाने व लोकशाही तत्त्वांनुसारच चालले पाहिजे, असे नगरसेवकांनी स्पष्ट केले आहे. नगरसेवकांना न कळवता आयोजित करण्यात आलेल्या जनता दरबारातून नागरिकांच्या प्रश्नांचे प्रत्यक्षात कितपत निराकरण होईल, याबाबत गंभीर शंका असल्याचेही नगरसेवकांनी नमूद केले आहे. नागरिकांच्या समस्या सोडविण्यासाठी नगरसेवक, प्रशासन व नगराध्यक्ष यांचा समन्वय अत्यावश्यक असल्याचे त्यांनी सांगितले. भविष्यात अशा प्रकारचे कार्यक्रम आयोजित करताना संबंधित प्रशासन व स्थानिक नगरसेवकांना विश्वासात घेऊनच निर्णय घ्यावा, अन्यथा लोकशाही प्रक्रियेला बाधा पोहोचेल, असा इशाराही नगरसेवकांनी दिला आहे.— नगरसेवक, नगरपरिषद तुमसर

नगरपरिषदेत दिलेले निवेदन:
प्रति,
मुख्याधिकारी,
नगर परिषद तुमसर, जि. भंडारा
विषय : महाराष्ट्र नगर परिषद, नगर पंचायत व औद्योगिक नगर अधिनियम, १९६५ (सुधारित) अन्वये नगराध्यक्षांकडून नियमबाह्य पद्धतीने “जनतादरबार” आयोजित केल्याबाबत तात्काळ कारवाई करण्याबाबत.
महोदय,
सविनय निवेदन असे की, नगर परिषद तुमसर येथे नगराध्यक्षांकडून नगरसेवक व सभापती यांना कोणतीही अधिकृत पूर्वसूचना, चर्चा किंवा नगरपरिषद प्रशासनाची परवानगी न घेता “जनतादरबार” आयोजित करण्यात येत असल्याची माहिती माध्यमांद्वारे प्राप्त झाली आहे. सदर प्रकार हा नगरपरिषदेच्या अधिकृत कार्यपद्धतीस व लोकशाही व्यवस्थेस बाधा आणणारा असल्याचे निदर्शनास येत आहे.
महाराष्ट्र नगर परिषद, नगर पंचायत व औद्योगिक नगर अधिनियम, १९६५ (सुधारित) नुसार नगरपरिषदेचे सर्व प्रशासकीय व धोरणात्मक निर्णय सर्वसाधारण सभा किंवा संबंधित समित्यांच्या ठरावांद्वारेच घेणे बंधनकारक आहे. तसेच अधिनियमातील कलम ५१ व ५२ नुसार नगरपरिषदेचे कामकाज हे अधिकृत सभांच्या निर्णयानुसार राबविले जाणे आवश्यक आहे. याशिवाय कलम ७२ नुसार नगरपरिषद प्रशासनाचे कामकाज व नागरिकांच्या तक्रारींचे निवारण हे मुख्याधिकारी व संबंधित विभागांच्या माध्यमातून नियमानुसार करण्यात येणे अपेक्षित आहे.
नगरसेवक हे आपल्या-आपल्या प्रभागातील नागरिकांचे लोकनियुक्त प्रतिनिधी असून नागरिकांच्या समस्या मांडणे व त्यावर पाठपुरावा करणे ही त्यांची कायदेशीर जबाबदारी आहे. अशा परिस्थितीत नगरसेवकांना विश्वासात न घेता व नगरपरिषदेच्या अधिकृत प्रक्रियेविना स्वतंत्रपणे जनतादरबार आयोजित करणे हे अधिनियमाच्या तरतुदींशी विसंगत असल्याची गंभीर बाब आहे. यामुळे नगरपरिषदेच्या अधिकार व कार्यपद्धतीबाबत नागरिकांमध्ये संभ्रम निर्माण होण्याची शक्यता आहे.
म्हणून आपणास विनंती आहे की, सदर प्रकरणाची तात्काळ दखल घेऊन वस्तुस्थितीची चौकशी करावी व महाराष्ट्र नगर परिषद, नगर पंचायत व औद्योगिक नगर अधिनियम, १९६५ (सुधारित) अंतर्गत आवश्यक ती प्रशासकीय कार्यवाही करावी. तसेच भविष्यात अशा प्रकारचे कार्यक्रम आयोजित करताना नगरपरिषदेची अधिकृत प्रक्रिया पाळणे व सर्व नगरसेवक व सभापती यांना पूर्वसूचना देणे बंधनकारक करण्यात यावे.
सदर प्रकरणाकडे योग्य ती कारवाई न झाल्यास आम्हाला संबंधित वरिष्ठ अधिकारी (उपविभागीय अधिकारी / जिल्हाधिकारी / नगरविकास विभाग) यांच्याकडे दाद मागण्याचा पर्याय अवलंबावा लागेल, याची कृपया नोंद घ्यावी.
धन्यवाद.
आपला विश्वासू,
(नाव)
नगरसेवक / सभापती
नगर परिषद तुमसर
ठिकाण : तुमसर





Total Users : 895442
Total views : 6505858
